«ون ءتورت جاسىمدا قولىما دومبىرا الىپ, ساحناعا شىققان ەدىم, قازاقتىڭ جىر-تەرمەلەرىن ايتتىم. مىنە, 80 جىلدان بەرى قازاقتىڭ ونەرىن, جىرىن جانىما سەرىك ەتتىم, ناسيحاتتاۋمەن كەلەمىن. ادەتتە, مەملەكەتتىك وسىنداي ماراپاتقا يە بولعاندار: «مۇنداي ماراپاتتى وزىمە قارىزعا الىپ جاتقانداي سەزىنەمىن, الداعى ۋاقىتتا بۇدان دا جاقسى جۇمىس ىستەيتىن بولامىن» دەگەن سياقتى لەبىزىن ايتىپ جاتادى. مەن نە دەرىمدى بىلمەي وتىرمىن» دەپ, ءازىلدى جانى سۇيەتىن قاسىمحان اعا جۋرناليستەردى ءبىر كۇلدىرىپ الدى.
ول ءتىلىمىز بەن ءدىنىمىز ەسىكتەن قاراپ قالعان ۋاقىتتا دا حالقىمىزدىڭ اۋىز ادەبيەتىن, جىرىن, ايتىس ونەرىن ناسيحاتتادى. ءوزى تالاي ايتىستارعا قاتىستى. 1961 جىلى قازاقستاننىڭ 40 جىلدىعىنا وراي وتكەن ايماقتىق ايتىستا باس جۇلدەنى جەڭىپ الدى. سول ايتىس تۋرالى «سوتسياليستىك قازاقستان» («ەگەمەن قازاقستان»), ءتىپتى «پراۆدا» گازەتى جازعان ەكەن. قاسىمحان اعا ۇلى وتان سوعىسىنان جەڭىسپەن ورالعان سوڭ, ءبىراز جىل مۇعالىم بولدى, الدىنان تالاي شاكىرت ءبىلىم الدى. ونان كەيىنگى جىلدارى جۋرناليستىك قىزمەتتە اۋىسىپ, ءوڭىردىڭ وزەكتى ماسەلەلەرىن ەلدىڭ, بيلىكتىڭ نازارىنا الىپ شىقتى. قاسىمحان اعايدىڭ ولەڭدەرى مەن پۋبليتسيستيكالىق شىعارمالارى ەكى توم بولىپ جارىق كوردى.
«قوستاناي سەكىلدى ءتىلىمىز كوپ زارداپ شەككەن وڭىردە حالقىمىزدىڭ ءتول ونەرىن ءومىر بويى ناسيحاتتاۋ دەگەن قاسىمحان اعانىڭ ەرلىك ءىسى دەۋگە بولادى. ول كىسىنىڭ قاراپايىمدىلىعى, كىسىلىگى ءبىر توبە» دەدى قاسىمحان اعانىڭ ارىپتەس ءىنىسى, قازاق تەلەجۋرناليستيكاسىنىڭ ارداگەرى قاجى قورعان.
ءنازيرا جارىمبەت,
«ەگەمەن قازاقستان»
قوستاناي
